“Sheshtani”  libër enciklopedik

Shkruan Gjekë Gjonaj

Në organizimin e Shoqatës “Dom Gjon Buzuku”, më 27 shkurt 2005, në sallën e madhe të Kuvendit Komunal të Ulqinit , u promovua libri monografik “Shestanistudim filologjik gjithëpërfshirës” i autorit Gjokë Dabaj. Në këtë manifestim ishte i pranishëm një numër i madh i adhuruesve të fjalës së shkruar nga Ulqini, Ana e Malit, Kraja, Tivari, Malësia, Shkodra, Tirana, Durrësi etj. Pjesëmarrësit ,  në emër të organizatorit të kësaj mbrëmjeje të organizuar  mirë, i përshëndeti, Zef Lukiqi, kryetar i Shoqatës “Don Gjon Buzuku”, njëheri edhe botuese e këtij libri.  Lukiqi, në fjalën e tij përshëndetëse, paraqiti një historik të shkurtër të  aktiviteteve dhe veprimtarisë botuese të kësaj shoqate, e cila kryesisht merret me  kulturën  mesjetare shqiptare, me theks të veçantë në ruajtjen dhe kultivimin e vlerave kulturore të Shestanit.

Prof. Dr. Agron Xhangolli nga Instituti i Kulturës Popullore  Tiranë, duke folur për librin, theksoi se kjo vepër përcjell fusha të ndryshme të gjuhësisë, historisë dhe kulturës popullore, e cila pasqyron saktësisht një trevë etnografike të cilën , siç tha ai, punonjësit e Institutit të Kulturës Popullore në Tiranë nuk e kanë njohur. Ai veprën e Dabajt e cilësoi si enciklopedike, duke pohuar se nga ajo  mund të mësosh dhe të marrësh informacione për shumëçka.

Folësi i radhës dr. Nail Draga u shpreh se ky botim është i rrallë për kohën, sepse është i tipit enciklopedik, ku përfshihen shumë fusha studimore, dhe si i tillë ka vlerë shumëdimensionale. Sipas Dragës kjo vepër është një letërnjoftim i identitetit etnokulturor të një treve me një të kaluar interesante historike nga koha antike e deri në ditët e sotme, e cila deri më tani ka qenë pak ose aspak e njohur për opinionin e gjerë.

Në vazhdim të kësaj mbrëmjeje promovuese përshëndetën dhe përgëzuan autorin, recensenti i librit Matish Shestani, prof. Dr. Mahir Hoti, rektor i Universitetit “Luigj Gurakuqi” në Shkodër, mr. Ismail Doda, Rikard Ljarja, aktor i njohur, prof. Dr. Gëzim Uruçi, Shkodër, pastaj, Nikë LukaLukiqi nga Kollomza, Ulqin, i cili tha “është nerim me e nie veten shestanas”.

Ky manifestim u gërshetua me disa pika të përzgjedhura muzikore, interpretuar nga Shaban Gjekaj dhe Viktor Nrekiqi, por edhe me veshjet popullore të kësaj trevë.  Mjaft i qëlluar ishte edhe  recitali i autorit, që ia kishte kushtuar vendlindjes së tij Shestanit, të cilin e recitoi bindshëm aktori i ri nga  Amulli, Simon Shkreli. Në fund autori Gjokë Dabaj falënderoi pjesëmarrësit, recensentët, bashkëpunëtorët, donatorët dhe të tjerët që kanë ndihmuar në hartimin e kësaj monografie.